ورقه من كتاب(الفلاتى لابن الشرابيه)
كتبهاخالد النشوقاتي ، في 22 أبريل 2009 الساعة: 20:03 م
كان الشارع00وكانت
خارجه من بطن عجوز
بتمارس عهر سنين
بتخطى
فيغطوا الدنيا بخور
وتخش الحمام قدامهم
ضحكتها بصوت مبلول
مية محياه
كانت بتطير بجناح
تسند رجليها على باب النصر
والرجل التانيه على بوابة المتولى
واحد شافها فى جامع00ضهرية
م الجعانين اتلمت على واحد ميت
فاكلوه
وليلتها شافوها فى حضن الوالى
كان الشارع وكان
احمد عرابى
-فاكر لما اتغدى براجلين
بعد م شربوا الشاى والشيشه
اهى عدت فى اليوم ده وطلعت
ع "الخوَاص"
طرحتها الخضره لحد كعوبها
ماشيه وفارده فى عودها
كان الخوّاص
قاعد بيبيع الخوص
والناس
ثايرين00جايين
شايلين مشاعلهم
خباها "الخوّاص" تحت الخوص
سألوه
تحت الخوص
سألوه تانى
تحت الخوص
فاسبوه
لمّت قلبها من تحت الخوص
جريّت
- لازم بنت الزانيه تموت
وسّخت الحسنيه
فى ميدان الجيش
قصدى فاروق الاول
كان لسه عرابى بيخطب فى الناس
احمد كخه بسيفه
البططى
شايل كشف الجهاديه وواقف
النسوان
مجموعه لابسين ملايات اللف
مجموعه خارجين لابسين قمصان النوم
وعيالهم بلابيص
الرجاله
عين لعرابى00وعين ع النسوان
وعرابى بينبح حسه
المشهد
ان الرجاله وقفوا جنب النسوان
ووراهم
رغم البرد
عرابى00وصلت له حراره
فاستأذن منهم يطلع بيته
احسن محصور
فالقاها على سريره اجمل م تكون
اللون البمبى غالب00تحت الشفاف
وعيون مليانه برغبة كل النسوان
بصوابع فاهمه وعارفه
بتدوّر على حاجه فى جسمه
شفايف
لا ف يوم داق ولا حا يدوق
ما فضلش فى صوته كلام
واتمنى ما تتكلمش
الناس حرارتهم طالعه له
وحراته خارجه من الشباك
فاخرج عريان
وحلف بطلاق نسوانه00بكل الايمان
انها لسه شريفه
اطهر من كل النسوان
وانها حا تعدى عليهم واحد واحد
تحكى لهم
سقّفت الرجاله
وسمعنا"الله اكبر"ولاول مره
بره الجامع
لكن00لما عرابى ما قدرش
بعد م حاول00مره واتنين وتلاته
اصبح بهلول
بيحارب كل الدنيا
على صدره
نياشين00من غطيان لقزايز فاضيه
0000000000000000انتهى
الباقى سطور مش واضحه
المصدر:من كتاب(الفلاتى لابن الشرابيه)
تعليق:يقال ان المصدر مش مظبوط
علشان ابن الشرابيه
اهله انضربوا فى خناقه مع الحسنيه
فشوه فى عرابى
اما فى مصدر تانى مجهول الاسم
ان عرابى اتجوزها
وخلف منها كتير
واحد منهم باع القهوه
اللى نجيب محفوظ
كان بيحب القعده عليها
وباع صوره لعرابى
على حصان
اما كبار الحى فقالوا:
قتلناها
وعرابى ما خلفش
اصله ولمؤاخذه كلمه فى سرك
عرابى
كان لمؤاخذه
مالوش فى النسوان
خالد النشوقاتى
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
