يا مصر

كتبهاخالد النشوقاتي ، في 17 مارس 2008 الساعة: 16:40 م

يا مصر عشقك ماهوش كلمه
بنكتبها ونتعلمها في الكتّاب
ماهوش خبطه علي الابواب
ولا داخله تكون بسلام
ولا تقديس لآل البيت
علي الاعتاب
ولا زرع
ولا حصد
ولا توبه
ولا ارباب
ومش نحات
ومش خطاط
ولا مصارعه م بين لخوات
ومش جاره
ولا واقفة شباب حلوه
بباب حاره
ومش جامع
ولا كنيسه
ومش في الصحرا تعريشه
وماهيش قصر
ومش بدله
ولا ملايه
ولا حدوته في حكايه
ولا تماثيل وفن جميل
ولا البحر اللي سموه النيل
ومش بساتين
ولا فدادين
ولا الناس اللي كابشه الطين
ولا المنتصره في حطين
ولا المهزومه بالخاينين
ولا اللي ماشيه عريانه علي الدكاكين
وفي البتارين
ولا اللي عقولها محطوطه ومكبوته
مابين زنازين
ومش هي اللي لابسه حجاب
ولا اللي ماشيه تتقصع علي الاكعاب
واكتر من كده يامصر
يا محميه
ياورديه
يا عريانه
يا مكسيه
يا زعلانه
يا فرحانه
يا كسلانه
يا عفيه
يا مصر

يا خلطه الاهيه

أضف الى مفضلتك