ما عادش لطلته معني
ولا عادت سكاكينهم بتدبحهم

وكان بهو الكافور
وصوت يوسف
نخيل واقف بيترنم
بلحن آمون
الملك لك
لكهان الملك
قدمت قرباني
بعين شايفه
قدم خايفه
تكون بره عن الملكوت

سنابل من بعيد خايفه جفاف الريق
وحابي من بعيد فارد فراغ ابريق

ولحظة لانتظار بتطول
ولاستئذان لأي دخول
لوقفة عشق بتنمل
دي رعشة كف تتململ
ما تجرحش الا حاجة الناس
وع السكه دي نتخدر
نلمّس شعرها تجري
نلمّس خصرها تغري
خزاين مصر مفروده لكف اديه
خزاين مصر ممدوده بشوق لعنيه
تشد قميصه من ضهره
ياخدها بخفه من ايده علي نهديه
وتنده ندهتين فينا
نبص لبعض مين فينا
انا صغيّر
وهو كبير
انا مشغول بلمسة كف
هو عصرها من بدري
ويملا شفايفه بالجمار
وبافرط حبتين رمان
بيدلي
لكف اديه

يميل تفضي خزاينها
ويورث عرشها دينها
–انا الواحد ماليش تاني
وتاني من عبايته يطل
بيحصد زهر وسنابل
مع ريحي بيتمايل

وبين كفيني يتسرسب
وانا باهرب اكون في عنيه
انا باجري
وهو يطير
ونتواعد علي قمره
ونتباعد علي جمره
ووعد بفرصه و محاوله
تكون بره علي الاسفلت
كما يوسف