كل اللي من دمها
ساعة المزاد ما حضرش
جانا الغريب يشتري
ببلاش
ما دفعش
لكن دفع جزمته
وشال فوق البيعه
صبايا ملاح
سمارهم
من عصير تفاح
نهودهم
تخطف الارواح
ارمح بفكرك
تخيّل المختال
محتال
غوّط في عرضك
شرب وسكر
خمير نهود
تخطف الارواح
ونام براحته و صحي
يقطف التفاح
والصبايا ملاح
يا الف اهه واهه
والرجال اشباح

باعها المستعصم مره
وباع معاها الشرف والكرامه
بالمره
واحنا بعناها وبعنانا
مش مره
كام مره
يا امه مالت
علي ميلها
وطال ليلها
حبا في الجواري و العبيد
لحد م مالت
علي حيلها

اتمضمضوا بالرمل
اتمخضوا بالملح
استشهدوا بالفرح
الحزن عم البلاد

لملم جناح مكسور
علق رايات سوده علي قصرك
اللي عالي السور
ولف صوتك شريط اسود
واكتب بدم البكاري
علي فخادهم
اخر نزيف امتي
حمل كاذب
نخله
نزعوا منها الطرح
طرحوها ارضا
كانت بتصرخ
وهي سايحه ف دمها
نزفت نزيف
مش جرح
اه والف اه

لملم جريدك وستّرها
ارفع عنيك عن عوارها
اوعوا تفتكروني
باكتب في موالها
او بانشره نعيها
علي حالها
لأ
لسه النهار ما ابتداش
لكن حا ييجي
من بطن طفله
لسه ابوها ما جاش
علي جبينها شامه وعلامه
وانا باحقق فيكم وحاسس
ان الزمن ما انتهاش
وقطع لساني لو اقولها
اه والف اه

الشمس ممكن تختفي
ممكن تجيها سحابه كدابه
والليل يطوّل
ويطلقوا كلاب علي ديابه
واحنا اللي نفضل نغني
لحن الصبر و الانتظار والتواكل
والمهانه والاستهانه
ونبيع في سوق النخاسه
الكرامه
اه والف اه

قرقش ضروع الخزي والعار
وافتكر ما تنامش
من كتر م شربت جاز
العالم بص لك ما فهمش

فوق من رقادك يا مارد
كسّر عروش النحس
قبل المزاد
والبيع
بالبخس
غايب عننا بكره
ومش حاسين بالنهارده
من يوم م ضاع مننا
في غفله
امس
مين يشتري
مين
يشتري