اشعار خالد النشوقاتي

باعرف انافق

قصدى مجامل

واعرف اشيل الشنطه واناول

متخصص فهلوه واونطه

واقدر اجمّع ناس ورا يافطه

واعرف اطاطى منين م تروح

بس يكون وياك لحلوح

ممكن اكون جلاد او قاضى

واصرخ اقول مليان00ع الفاضى

واعمل دراسات ميه الميه

واكتب اقول دول اشرف ناس

بالمستندات

لو كانوا فاسدين او كانوا حراميه

متخصص تلفيق شعارات

وخبير تزوير انتخابات

اعلامى م الدرجه الاولى

كلامنجى وافهم فى الفوله

المزيد

حا اشترى كام بدله وكام جرافته

وجوز قمصان وجوزين شرابات

واصبغ لون شعرى واتخن صوتى00

وحا افرد ضهرى00وحااصرخ بالصوت00

الحيانى فى الانتخابات

وحا اموّل حملتى من امريكا معونه

جايه فى صندوق الدولارات

صندوق علشانى وعلشان غيرى

وكام صندوق علشان التانى

اللى مسمى التمويل00اعانات

يا اخى شىء من بره

وشىء من جوه ويمشى الحال

واهى ماشيه

بينى وبينك

اللى مخوفنى الشعب

الناس يعنى

اللى ساعات يتهيألك انها مش فاهمه

وفجأه

المزيد

شفته

على باب الفتوح

وسمعته آدان بيصلى00للوطن

وف قلب العتمه الرخوه

لقيت صوت راجل

اجمل من النقش المملوكى

على حيط لجدار00الضل

استنى عليه

وعمل م العتمه ملامح

لكن

باب النصر هناك مفتوح

فاتمدت ايد

وخرج م القلب شديد

الصوت اللى اترجت له جدران الحاره

وشواشى النخل

وبدا كنسيم الضوء

اللى اتفجّر فى العتمه حياه

ياااااااه

يا قلب وغنى للكون لمداه

لحقيقه

وكأن الناس الخايفه بتستناه

الله

يا معطر صدرك بتراب الوطن الاسمر

المزيد

        "يا بنت الكلب غبتى كتير عليّه

         ياااه00كنتى فين؟"

مش بدارى الحسن ولاّ

حسنك الفتّان لجوه

ضحكتك بترج روحى

بسمتك تنفع غلاف

لجدع مجله

مين فى رقة بنتى مين

عقد فل بيحضنه رموش عاشقين

ولاّ رعشة كف خايفه00بتلمسك

وتتوه مع الشوق فى الحنين

ولاّ دمعة خوف بتجرى

وتختفى جوه السنين

آه00كنتى فين

هزهزى سريرك وغاغى

اسكنى قلبى ودماغى

اسحفى وحمينى فرحه

اشرقى وعليلى ضحكه

وادخلى الدكاكين ولاغى

كسرى الموجود باءيدك

والبسى الفستان فى ايدك

افتحى قلوبهم باءيدك

العبى بكل اللى داخل

واللى خارج

ايد ماليها اكياس وايد تانيه

بتلمس شوق فى ايدك

آه00يا عيدك

معقوله مرت سنه

احتفلنا ويا اول سنه ظهرت

عضتينى

عضى تانى

فوّقينى

عيّشينى فى الحقيقى

المزيد

كان الشارع00وكانت

خارجه من بطن عجوز

بتمارس عهر سنين

بتخطى

فيغطوا الدنيا بخور

وتخش الحمام قدامهم

ضحكتها بصوت مبلول

مية محياه

كانت بتطير بجناح

تسند رجليها على باب النصر

والرجل التانيه على بوابة المتولى

واحد شافها فى جامع00ضهرية

م الجعانين اتلمت على واحد ميت

فاكلوه

وليلتها شافوها فى حضن الوالى

كان الشارع وكان

احمد عرابى

-فاكر لما اتغدى براجلين

 بعد م شربوا الشاى والشيشه

 اهى عدت فى اليوم ده وطلعت

 ع "الخوَاص"

 طرحتها الخضره لحد كعوبها

 ماشيه وفارده فى عودها

كان الخوّاص

قاعد بيبيع الخوص

والناس

ثايرين00جايين

شايلين مشاعلهم

خباها "الخوّاص" تحت الخوص

سألوه

 تحت الخوص

سألوه تانى

 تحت الخوص

فاسبوه

لمّت قلبها من تحت الخوص

جريّت

     - لازم بنت الزانيه تموت

       وسّخت الحسنيه

فى ميدان الجيش

قصدى فاروق الاول

كان لسه عرابى بيخطب فى الناس

احمد كخه بسيفه

البططى

شايل كشف الجهاديه وواقف

النسوان

مجموعه لابسين ملايات اللف

مجموعه خارجين لابسين قمصان النوم

وعيالهم بلابيص

الرجاله

عين لعرابى00وعين ع النسوان

وعرابى بينبح حسه

المشهد

ان الرجاله وقفوا جنب النسوان

ووراهم

رغم البرد

عرابى00وصلت له حراره

فاستأذن منهم يطلع بيته

احسن محصور

المزيد

اشتهيت مرمر بيتشكل جمال

النسمه تقدر تعبره

فى أى وقت وتهجره

تتشكل النسمات00قسمات

على راحة السنين

وتمد ايدك تشتهيه

يلعب معاك

لعبة الرمان

اللى فرطه حلال

يا منفلوطى

اللى اشتهاك00خيّال

وخال عليه لعبك

يا اللى بتغازل عيوننا المبلولين

من ميتك

يا شهد خالص

واشتهاك نشوان

حرّك عيونى

نام فوق صوابعى00اهدهدك

قلبى اللى ناحته من رخام

اتهد لك

العشق لك

السهد لك

البدع لك

يا صاحب الرعشه اللذيذه المعجزه

المزيد

زى اديك يوم ما اتمدت

على حاجه ماهيش عجباك

زى فى مره ما حبيت

وسمعت باحبك منها

حسيت لحظتها00انها مش هيه

وانك بس اندبيت

هو ده احساسى

ساعة ما قريت الجرنان

المزيد

بطنى اتقلبت

ومزاجى اتعكنن

وما عودتش زى الاول

لا فى رغبه فى نوم

ولا اكل

ولا حتى قرايه

المزيد

انك تركب اوتوبيس

من غير ما يضايقك حد

او حد يشوفك

يضحك لك

ضحكه بجد

او تلقى الناس فرحانه

بيوم الحد

المزيد

زى نسمه

جايه من شباك صغيّر

فوق خدود لفحتها نار الحب مره

ومره

من لهيب الشوق وحر الصيف ولوعة لانتظار

ماشيه

فوق صخور أخضّر لونها

وهيه بتحاول توازن

بين رزاز الموج ولسعة برد

المزيد